ဆက်သွယ်ရေး ဝန်ဆောင်မှု လုပ်ငန်းတွေ တိုးတက်လာတာနဲ့အတူ စမတ်ဖုန်းတွေ အသုံးပြုရာမှာလည်း တိုးတက်လာပြီ ဖြစ်ပါတယ်။ ၂၀၁၀ ပြည့်နှစ် ဝန်းကျင်ကစပြီး စမတ်ဖုန်းတွေ စသုံးလာတာ အခုချိန်မှာတော့ ဒီဖုန်းတွေက မရှိမဖြစ်အဖြစ် သတ်မှတ်ခံနေရပါပြီ။ အခုအခါ ဆက်သွယ်ရေး ကုမ္ပဏီသစ်တွေက နောက်ဆုံးပေါ် နည်းပညာတွေ အသုံးပြုထားတဲ့ ဆက်သွယ်ရေး ဝန်ဆောင်မှုတွေ ပေးလာကြသလို ဖုန်းဆင်းကတ်တွေမှာလည်း ဈေးနှုန်းချိုသာစွာနဲ့ လွယ်လပ်ပေါများစွာ ဝယ်ယူနိုင်ကြပြီ ဖြစ်ပါတယ်။ ဒါကြောင့် လက်နဲ့ ထိလိုက်ရုံနဲ့ လွယ်ကူစွာ ဆက်သွယ်ပြောဆိုနိုင်သလို၊ နိုင်ငံတကာနဲ့ ချိတ်ဆက်နိုင်မယ့် အင်တာနက် ဝန်ဆောင်မှုတွေနဲ့အတူ ကင်မရာနဲ့ စာအုပ်လို အသုံးပြုစရာတွေ ပါဝင်တဲ့ စမတ်ဖုန်းတွေက အခြေခံ လူတန်းစား အများစုအတွက် လက်လှမ်းမီလာနိုင်တဲ့ နေ့စဉ်သုံး ပစ္စည်းတစ်ခု ဖြစ်လာတော့မှာပါ။ဒီလို စမတ်ဖုန်းတွေက နေ့စဉ်ဘဝမှာ ကောင်းကျိုးများပြီး အဘက်ဘက်က အသုံးဝင်နေပေမယ့်လည်း အရင်က နွေးထွေးတဲ့ လူမှုစကားဝိုင်းတွေကိုတော့ တစ်ဖက်တစ်လမ်းက ဖျက်ဆီးပစ်နေပါတယ်လို့ ဗဟန်းမြို့နယ်မှာနေတဲ့ အသက် ၂၉ နှစ်အရွယ် ကိုနေလင်းက ပြောပါတယ်။ “စမတ်ဖုန်းသုံးရတာ အရမ်းကောင်းပါတယ်။ ဒါပေမဲ့ သူငယ်ချင်းတွေ စုပြီး လက်ဖက်ရည်ဆိုင်ထိုင်တဲ့ အခါမျိုးတွေမှာတော့ အရင်က နွေးထွေးတဲ့ ရင်းနှီးမှုတွေအစား လူစုထိုင်နေတဲ့အချိန်မှာ တစ်ယောက်နဲ့ တစ်ယောက် စကားမပြောကြပဲ ကိုယ့်ဖုန်း ကိုယ်ထုတ်သုံးနေကြတော့ အေးစက်တဲ့ စကားဝိုင်းတွေ ဖြစ်လာတယ်လို့ ခံစားမိတယ်” လို့ ကိုနေလင်းက သူ့အမြင်ကို ပြောပါတယ်။
ဓာတ်ပုံရိုက်နိုင်၊ သတင်းတွေကို အချိန်နဲ့ တစ်ပြေးညီ သိနိုင်တဲ့အတွက် စမတ်ဖုန်းကို သုံးဖြစ်နေတယ်ဆိုတဲ့ ကိုနေလင်းက စကားသံတွေ တဖြည်းဖြည်း တိတ်ဆိတ်လာတဲ့ လူငယ် စကားဝိုင်းတွေကို အားမလိုအားမရ ဖြစ်မိတယ်လို့ ပြောပါတယ်။ “ကိုယ့်ဘေးနားမှာ အတူတူရှိနေတဲ့သူကို ကျော်ပြီး ကိုယ်နဲ့ အပြင်မှာတောင် တစ်ခါမှ မတွေ့ဘူးတဲ့ အင်တာနက်က သူငယ်ချင်းတွေကို လှမ်းဂရုစိုက်ပြနေကြတာ တော်တော် စိတ်မကောင်းစရာပါပဲ။ အတူထိုင်နေတဲ့ သူငယ်ချင်းတွေ အချင်းချင်း စကားမပြောကြပဲ အဝေးက လူတွေကို လှမ်းပြီး အလုအယက် စကားတွေ ပြောနေတတ်ကြတယ်” လို့ သူက ပြောပါတယ်။ လူငယ်တွေကြား ပျော်ရွှင်စရာ အကျင့်တွေကိုပါ ပျောက်ဆုံးလာစေတယ်လို့လည်း သူက ဆိုပါတယ်။ “အရင်က တစ်ယောက်နဲ့ တစ်ယောက် စနောက်တဲ့ အကျင့်တွေ၊ နောက် ကော်ဖီခွက်ထဲ ကျောက်ခဲခိုးထည့်ထားတာတို့၊ အကြောင်းအရာ တစ်ခုခုကို အလုအယက် ဆွေးနွေးငြင်းခုံတာတို့လိုတွေ မရှိတော့ဘူး။ အခုခေတ်လူငယ်တွေတင် မဟုတ်ဘူး လူလတ်ပိုင်း စကားဝိုင်းတွေလည်း တိတ်ဆိတ်လာပြီ” လို့ ကိုနေလင်းက ပြောပါတယ်။ ကိုယ်တိုင် စမတ်ဖုန်း သုံးနေချိန်မှာ တိတ်ဆိတ်လာတဲ့ စကားဝိုင်းတွေအကြောင်း သတိမထားမိပေမယ့် ဖုန်းမပါတဲ့ အချိန်တွေမှာတော့ စမတ်ဖုန်းကြောင့် ရင်းနှီးမှုပျောက်တဲ့ ပုံစံကို ပိုသိလာရတယ်လို့ သင်္ဃန်းကျွန်း မြို့နယ်မှာ နေတဲ့ မရွှေရည်က ပြောပါတယ်။
“ကျောင်းမှာ သူငယ်ချင်းတွေ အချင်းချင်း တွေ့ကြရင် ဖုန်းပဲ ထုတ်သုံးနေကြတာ အကျင့်လိုဖြစ်နေပြီဆိုတော့ သိပ်သတိမထားမိဘူး။ ဒါပေမဲ့ စကားမပြောကြပဲ တူတူထိုင်ရုံထိုင်နေကြတာကို ကိုယ်တိုင် ဖုန်းမပါတဲ့ အချိန်ကစပြီး လူတွေ သတိထားမိလာတယ်။ အင်တာနက် မသုံးရင်တောင် ဂိမ်းတွေ ဖွင့်ဆော့နေကြတာကို သတိထားမိပြီး အံ့လည်း အံ့သြတယ်” လို့ ပထမနှစ် ဥပဒေကျောင်းသူ မရွှေရည်က ပြောပါတယ်။ နောက်ထပ် သတိထားမိတဲ့ အချက်တစ်ချက်ကတော့ အင်တာနက်မှာ တစ်ယောက်နဲ့ တယောက် တွေ့ချိန် ရင်းနှီးဖော်ရွေတဲ့ စကားလုံတွေ သုံးသလောက် အပြင်မှာ တွေ့ချိန် အချင်းချင်း သိပ်မရင်းနှီးသလို ခံစားမိစေပါတယ်တဲ့။ “နေမကောင်းဘူးလို့ အင်တာနက်မှာ တင်လိုက်ရင် ဘေးမှာထိုင်နေတဲ့ သူငယ်ချင်းက ကိုယ့်ကို အပြင်မှာ အေးဆေး သူ့ဘာသာနေပေမယ့် အင်တာနက်မှာတော့ ဂရုစိုက်နော်၊ စိတ်ပူတယ်၊ ဘာညာဆိုပြီး စာတွေ ရေးလာပြန်ရော။ တူတူထိုင်ပြီး ဖုန်းကိုပဲ ဂရုစိုက်နေတာကို ကိုယ်တိုင် တွေ့နေရတော့ ဘာပြောရမှန်းကို မသိတော့ပါဘူး” လို့ မရွှေရည်က ပြောပါတယ်။ ဒီလို စမတ်ဖုန်းရဲ့ လူမှုဝန်းကျင်ကို ထိခိုက်စေတဲ့ အားနည်းချက်တွေ ရှိပေမယ့်လည်း အားသာချက်တွေကတော့ ပိုများနေတယ်လို့ မြောက်ဒဂုံမြို့နယ်မှာနေတဲ့ ကိုမျိုးလွင်ဦးက ပြောပါတယ်။ “အစ်ကိုဆို အိမ်စီးပွားရေး လုပ်တယ်၊ အပြင်မှာ အငှားကားလည်း ထွက်မောင်းတယ်။ ဘာသတင်း သိချင်လဲ ချက်ချင်း သိလာရတယ်။ ကိုယ့်လက်ထဲမှာ စမတ်ဖုန်းရှိနေတာကိုး။ အရင်ကလို ဖုန်းဆက်ပြီး မေးစရာတောင် မလိုတော့ဘူး” လို့ သူက ပြောပါတယ်။ “တကယ်လို့ အပြင်မှာ ကားလိုက်မောင်းပို့ရင်း ခရီးသည်ကို စောင့်ရရင် အရင်ကလို မပျင်းရတော့ဘူး။ အင်တာနက် မသုံးရင်တောင် ဂိမ်းဆော့ပြီး အချိန်ဖြုန်းနေလို့ ရပါတယ်” လို့ သူက ဆိုပါတယ်။ ဒါပေမဲ့လည်း မိသားစုနဲ့ အတူနေတဲ့ အချိန်တွေမှာတော့ စမတ်ဖုန်း အသုံးပြုမှုကို ခဏရပ်ထားလေ့ ရှိတယ်ဆိုတာကြောင့် တကယ်တမ်းမှာ စမတ်ဖုန်းက ဖျော်ဖြေခံ အသုံးချစရာ ပစ္စည်းတစ်ခုပဲ ဖြစ်နေပါတယ်လို့ သူက ပြောပါတယ်။ တစ်ချက် တို့ထိလိုက်ရုံနဲ့ အာရုံတစ်ခုလုံးကို ဆွဲဆောင်ထားနိုင်တဲ့ စမတ်ဖုန်းတွေရဲ့ ကောင်းတဲ့ အချက်တွေကြောင့် မသိမသာ ပျောက်ဆုံးလာတဲ့ လူမှု အသိုင်းအဝိုင်းက နွေးထွေးမှုတွေကိုလည်း တစ်လှည့် ပြန်သတိထားမိတဲ့သူ အရေအတွက်ကတော့ အခုချိန်ထိ နည်းပါးနေတုန်းပါပဲ။ ဒါပေမဲ့ အခုချိန်မှာတော့ သက်ကြီးပိုင်းနဲ့ အင်တာနက် မရတဲ့ အချို့ ဒေသတွေကလွဲရင် လူအများစုက ခလုတ်ဖုန်းတွေကို မသုံးချင်ကြတော့ပဲ စမတ်ဖုန်းတွေကိုသာ သုံးနေကြပါပြီ။
No comments:
Post a Comment